Ponta Malongane November 2017

Hallo weer. Wel ons en die Oosthuisens was toe vir twee weke na Mosambiek te Ponta Malongane vir 'n lekker kuier.
Die weer was meestal baie lekker hoewel ons 'n paar dae reen gekry het.
Ek het ook 'n paar lekker duike gedoen en baie seelewe en koraal gesien.
Ek heg weer so 'n paar fotos aan van die hoogtepunte. Met een van my duike het die geniepsige Twobar Anemoonvissie my aangeval, gelukkig het dit my duikhorlosie se bandjie gebyt en nie my arm nie. Hulle is bekend daarvoor om hul neste tot die dood toe te beskerm. Dis gelukkig darem net so 100 - 120mm groot.

Kruger Wildtuin Sept 2017

Wel toe vertrek ons vanaf die Eiland na die Kruger Wildtuin waar ons vertoef in kampe Letaba 2 nagte, Skukuza 5 nagte en Malelane 4 nagte. Vandaar is dit weer terug huis toe vir 'n wyle.
Die weer was vrek warm by Letaba en Skukuza en op Malelane het ons egter koeler weer gehad en selfs 'n bietjie reen.

Hier is so 'n paar fotos geneem in die Wildtuin tydens ons verblyf.

Die Eiland (Tzaneen) Augustus 2017

Wel hier rus ons verder vir 'n maand by die ATKV Eiland Spa naby Tzaneen,
Dis meestal lekker warm hier so in die 30's bedags maar in die nag kan dit maar nog lekker koel raak.
Ons gaan Gym soggens so rukkie, sit dan in die sauna en of stoomkamer en hang verder rond in die warmwater swembaddens binne en buite.
Dan natuurlik braai en drink, baie stresvolle lewe die pensioen.

Wel hier is so paar fotos van die oord, ons gaan so teen 10 September voort na die Kruger wildtuin.
Groetnis.

Ponta Malongane - Mosambiek

Hallo weer, so was ons toe nou Malongane toe vir 16 nagte vir 2 tot 18 Mei 2017. Die weer was uitstekend met die uitsondering van 'n paar dae se kwaai wind en bietjie reen. Ons het lekker ontspan en ek het 2 duike gaan doen.

Hier volg so paar fotos van ons tydtjie daar.

Kaap toe Januarie 2017

Nouja, toe het ons en die Oosthuisens op 15 Januarie die pad gevat vanaf Pretoria na die Kaap. Hier volg 'n paar fotos op ons roete van Pta na Mosselbaai tot en met ons aankoms by Hartenbos. Hier bly ons nog tot 3 Maart (5 weke) vanwaar ons weer stelsematig sal beweeg huis toe. Ek sal weer opdateer soos die tyd loop. Groete.

Ons het 'n salige 5 weke gebly op hartenbos. Heelwat plekke besoek soos Jakkalsvlei Wynplaas en met die 7 Pas roete gery tot in Knysna. By Jakkalsvlei kon jy druiwe pluk en hulle maak die heerlikste Pizza's.

 Die Strandmeer by Hartenbos se water was al vrot en ons het gesien hoe hulle met .n skopgraaf 'n sloot grou so 1m diep en 2m wyd vanaf die meer tot in die see. Die stroom water het oornag sie sand uit ge-kolwe tot 'n volskaalse riviertje.

Na ons verblyf by Hartenbos (Mosselbaai) het ons en die Oosies se paaie geskei, Hulle is voort na PE se kant toe en ons is na Goudini Spa naby Worchester waar ons vir 'n week gebly het. Baie wynplase besoek insluitend Delheim Wynplaas wat Anita nog altyd graag wou besoek maar nog nooit die geleendheid gekry het nie.
Die Goudini spa het heerlike vuurwarm water wat natuurlik uit die grond uit borrel.

Vanaf Goudini Spa het ons vertrek na Langebaan waar ons in Leentjiesklip Oord vir 'n week gebly het. Die wind was nogal erg hierso.
Van hier af het ons o.a. Darling besoek waar ons na die Darling Bier Brouery was en ook 'n vertoning van "Evita praat Kaktus" by Evita se Perron gaan kyk het. Dit was skreeusnaaks. Ons het ook gaan uiteet by die opelug Strandloper Restaurant.

Vanaf Langebaan het ons vertrek na Calvinia waar ons een nag oorgebly het, daarna ook een nag by Vryburg oorgeslaap en toe huis toe. Nou werk ons aan die planne vir die volgende uitstappie, moontlik Ponta Molangene - Mosambiek.